TREGONING, WILLIAM EDWARD CECIL (1871 - 1957), diwydiannwr

Ganwyd 17 Chwefror 1871, yn ail fab John Simon Tregoning o Llanelli, Sir Gaerfyrddin, a Launceston, a'i wraig Sophia (ganwyd Morris; o Lerpwl). Addysgwyd ef yn Harrow a Choleg y Drindod, Caergrawnt. Daeth yn wneuthurwr tunplat a chyfarwyddwr Cwmni John S. Tregoning Cyf. (un o weithfeydd tunplat cyntaf Llanelli), Bynea Steel Works Ltd., St. David's Tinplate Co., a chwmnïau eraill. Yr oedd yn un o sylfaenwyr ac ymddiriedolwyr y Welsh Plate and Sheet Manufacturing Association, yn aelod o'r International Tinplate Association a'r National Food Canning Council cyn Rhyfel Byd II. Bu'n hael ei gefnogaeth i'r Eglwys yng Nghymru, a'i gwasanaethu trwy fod yn aelod o'r llys llywodraethol ac yn drysorydd a chadeirydd Bwrdd Cyllid Esgobaeth Tyddewi o 1923 ymlaen. Bu'n gadeirydd nodedig o lys ynadon Llanelli am lawer o flynyddoedd ac ymddeolodd yn 1950 ar ôl bod yn Y.H. am 36 mlynedd.

Priododd yn Hydref 1901 â Nancy, merch J. Beavan Phillips, a bu iddynt bedwar mab a dwy ferch. Ymgartrefodd yn Portiscliff, Glanyfferi, Llanismel, Sir Gaerfyrddin, a bu farw 9 Mawrth 1957.

Awdur

• Dr Mary Auronwy James

Ffynonellau

• Iron and steel, 30, 1957, 158
• Llanelly Star, 16 Mawrth 1957
• Mynegai Bywgraffyddol W. W. Price

Dolenni Ychwanegol

• Wikidata: Q20734595

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/