Am y rhan fwyaf o'i oes bu'n arweinydd a beirniad mewn llu o eisteddfodau gogledd a chanolbarth Cymru ; bu'n un o hyrwyddwyr Eist. Gen. gyntaf Urdd Gobaith Cymru yng Nghorwen yn 1929 . Rhwng 1938 ac 1950 ef oedd arweinydd ffraeth Parti Tai'rfelin (gw. Robert Roberts isod) a fu'n cynnal cyngherddau trwy Gymru a chyda chymdeithasau Cymraeg yn Lloegr . Cymerth ran yn fynych hefyd mewn rhaglenni darlledu a theledu .

Yr oedd ganddo ddawn y cyfarwyddiaid i adrodd stori ar lafar ac ar lyfr . Gwelir hyn yn ei gyfrol hunangofiant Y Pethe ( 1955 ), teitl a ddaeth wedyn i sefyll am y gwerthoedd a'r traddodiadau a gysylltir â'r bywyd Cymraeg ar ei orau. Yn 1966 cyhoeddwyd cyfrol o'i lythyrau, sef Diddordebau , wedi eu golygu gan ei nai, Trebor Lloyd Evans , a chyhoeddwyd casgliad o'i ysgrifau i'r Welsh Farm News a chyfnodolion eraill, Adlodd Llwyd o'r Bryn , gan ei ferch, Dwysan Rowlands , yn 1983 . Ar ôl ymddeol, bu hefyd yn darlithio ar fywyd a diwylliant gwledig mewn llu o ganolfannau. Ceir disgrifiadau ohono gan Robin Williams yn Y tri Bob ( 1970 ) ac yn Portreadau'r Faner ( d.d. ). Bu f. 28 Rhag. 1961 ac fe'i claddwyd ym mynwent Cefnddwysarn . Yn 1963 , sefydlwyd Gwobr Llwyd o'r Bryn am adrodd yn yr Eist. Gen. er cof amdano.