JONES, HERMAN (1915 - 1964), gweinidog (A) a bardd

Ganwyd 24 Ionawr 1915, yn 12 Caradog Place, Deiniolen, Sir Gaernarfon, yn fab Hugh Edward Jones, ymgymerwr ac adeiladydd, ac Elizabeth ei wraig. Cafodd ei addysg yn ysgol y cyngor, Deiniolen, ysgol sir Brynrefail, y Coleg Normal, Bangor, a derbyniwyd ef i Goleg Bala-Bangor 29 Medi 1938. Graddiodd gydag anrhydedd yn y Gymraeg yn 1941 ac yn M.A. yn 1953. Ni orffennodd ei gwrs diwinyddol gan iddo dderbyn galwad o Salem, Porthmadog, a chael ei ordeinio yno 21 Gorffennaf 1943. Symudodd i Jerusalem, Porth Tywyn, a'i sefydlu yno ar 17 Tachwedd 1954 ac yno y bu hyd ei farw yn ysbyty Bangor, o ganlyniad i drawiad disymwth ar y galon, 3 Mehefin 1964. Yr oedd yn bregethwr gyda galw mawr am ei wasanaeth a pherthynai i draddodiad y pregethu barddonol ac eglurebol.

Blodeuodd yn gynnar fel bardd gan ennill gwobrau lawer mewn eisteddfodau lleol cyn ennill y goron yn Eisteddfod Genedlaethol Aberteifi (1942) am ei bryddest ar 'Ebargofiant'. Syml, cynnil, crefftus a thelynegol oedd prif nodweddion ei ganu. Cyhoeddodd Hanes Eglwys Annibynnol Jerusalem, Burry Port, 1812-1962 (1962) ac ar ôl ei farwolaeth cyhoeddwyd sylwedd ei draethawd M.A., Y Soned yn Gymraeg hyd 1900 (1967). Priododd, 14 Awst 1946, â Ffion Mai, merch David Thomas, Bangor (1880 - 1967), a bu iddynt ddau fab.

Awdur

• Y Parchedig Brifathro Robert Tudur Jones, (1921 - 1998)

Ffynonellau

• Blwyddiadur yr Annibynwyr Cymraeg, 1965, 152-3
• gwybodaeth bersonol

Darllen Pellach

• Archifau LlGC: Rhion Herman Jones Llafur

Dolenni Ychwanegol

• Wikidata: Q20733170

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/