EVANS, EBENEZER GWYN (1898 - 1958), gweinidog (MC)

Ganwyd 31 Mai 1898 yng Ngellilenor Fawr, Llangynwyd, Morgannwg, mab ieuangaf Benjamin a Gwenllian Evans - y fam o gyff Dafydd Morris yr Hendre (1787 - 1858). Addysgwyd ef yn ysgol elfennol ac ysgol sir Maesteg, ac ar ôl dechrau gweithio ar fferm ei dad bu'n athro ysgol am dymor. Ymunodd â'r fyddin yn ystod Rhyfel Mawr I, ac ar ddiwedd y rhyfel aeth i Goleg y Brifysgol, Aberystwyth (lle graddiodd gydag anrhydedd mewn athroniaeth) a dechrau pregethu. Gorffennodd ei addysg yng ngholegau diwinyddol Aberystwyth a'r Bala. Ordeiniwyd ef yn 1927, a bu'n gweinidogaethu yn Rock Ferry (1927-30), Cathedral Road, Caerdydd (1931-36), Trinity, Abertawe (1936-39) a Charing Cross Road, Llundain (1939-58). Priododd, 1927, Enyd Jane Jones, merch Edward Jones ('Iorwerth Ddu'), Maesteg, a ganed dau fab o'r briodas. Bu farw 23 Gorffennaf 1958.

Yr oedd yn bregethwr coeth a grymus, yn Saesneg ac yn Gymraeg, ac o'r herwydd bu galw mawr am ei wasanaeth yn ne a gogledd Cymru. Bu'n gadeirydd Undeb Eglwysi Rhyddion Lloegr a Chymru (1957-58). Ysgrifennodd i'r Goleuad ac i'r Drysorfa, ac yn 1951 cyhoeddodd hanes eglwys Charing Cross Road dan y teitl Y ganrif gyntaf.

Awdur

• Y Parchedig Gomer Morgan Roberts, (1904 - 1993)

Ffynonellau

• J.M. Jones, Hanes Eglwys Tabor, Maesteg (1940), 29
• Y Goleuad, 6 Awst 1959
• Blwyddiadur y Methodistiaid Calfinaidd, 1959, 263
• Y Drysorfa, Ionawr 1959
• gwybodaeth gan ei fab, Hywel I. Evans, Penmaen-mawr
• adnabyddiaeth bersonol

Dolenni Ychwanegol

• Wikidata: Q20732911

Dyddiad cyhoeddi: 1997

Hawlfraint Erthygl: http://rightsstatements.org/page/InC/1.0/