Llyfrgell Genedlaethol Cymru :: Y Bywgraffiadur Cymreig

A B C D E F G H I J K L M N O P Q R S T U V W X Y Z

EVANS , WILLIAM EILIR ( Bywg. , 243a) bu'n gurad yn Llanfaelog (Môn) , Devizes , ac Aberdâr , ac am ychydig yn athro ac yn gaplan yn ysgol ramadeg Stratford-on-Avon . Yn 1889 , golygai'r Carmarthen Journal ; aeth yn 1891 i Abertawe , ac yn 1894 i Gaerdydd , lle y bu am 13 ml. ar staff y Western Mail , ac ar brydiau'n gwasanaethu yn Eglwys Dewi Sant . O 1907 ymlaen bu'n gurad yn Llancarfan .

Atodiadau a chywiriadau:

EVANS , WILLIAM EILIR (‘ Eilir ’; 1852 - 1910 ), clerigwr a bardd ; g. 26 Ebrill 1852 yn y Garreg Lwyd , Cenarth , sir Gaerfyrddin . Annibynnwr ydoedd, ac aeth fel myfyriwr i Goleg Presbyteraidd Caerfyrddin . Troes at Eglwys Loegr yng Nghymru , a mynd yn 1878 i Goleg Dewi Sant , Llanbedr-pont-Steffan . Daliodd rai bywiolaethau, ond ni fu ryw lawer o lun arno fel offeiriad . Bu hefyd yn ysgolfeistr . Am y 13 mlynedd olaf o'i fywyd bu ar staff lenyddol y Western Mail .

Yr oedd yng Nghastellnewydd Emlyn yn y cyfnod hwnnw gylch o feirdd fel ‘ Emlynydd ,’ ‘ Myfyr Emlyn ,’ ‘ Rhys Dyfed ,’ ac eraill, a chychwynnodd W. Eilir Evans tan eu dylanwad farddoni yn ifanc a chystadlu yn eisteddfodau'r ardal . Enillodd y gadair yn eisteddfod Deheudir Cymru yn Aberteifi , 1878 , ar awdl ar ‘ Gwareiddiad ,’ ac argraffwyd hi yn 1884 . Cyfieithodd Essay on Criticism ( Pope ) yn Gymraeg yn Yr Haul , ac ‘ Elegy in a Country Churchyard ’ ( Gray ). Cyhoeddodd gerddi ac erthyglau yn Y Byd Cymreig (papur a argraffwyd yng Nghastellnewydd Emlyn ), Y Geninen , Y Traethodydd , Yr Haul , Y Dywysogaeth , Celt Llundain , Papur Pawb , The Aberystwyth Observer , a phapurau eraill. Yn 1910 cyhoeddodd gasgliad o'i erthyglau a'i gerddi, Rhyddiaith a Chân . Bu f. 7 Rhagfyr 1910 .

Llyfryddiaeth:

Western Mail , 8 Rhagfyr 1910 ;
‘Atgofion’ yn Rhyddiaith a Chân , 1909 .

Awdur:

David Gwenallt Jones, M.A., (1899-1968), Aberystwyth