WILLIAMS, RICHARD (bu farw 1724), gweinidog gyda'r Bedyddwyr

Codwyd ef i bregethu yn Rhydwilym, ac er nad oes gofnod o'i fedyddio yn llyfr yr eglwys, mae'n debyg mai ef yw'r gŵr a enwir gyda Mary, ei wraig, dan blwyf Llanglydwen, yn y rhestr aelodau yn y flwyddyn 1689. Y mae sôn amdano'n bedyddio yno ym mlynyddoedd olaf y ganrif, ond tua diwedd 1700 ymunodd Olchon, Llaneigon, a'r eglwys newydd yn y Trosgoed (Maes-y-berllan) i'w sefydlu'n weinidog arnynt, ac yno y treuliodd weddill ei oes hyd ei farw mewn gwth o oedran yn 1724. Nid oedd Joshua Thomas yn cofio iddo adael teulu. Yr oedd yn aelod amlwg o gymanfa newydd y Bedyddwyr, ac ef, yn Abertawe yn 1704, oedd un o'r cyntaf i bregethu ynddi, ond ymddengys yr adwaenid ef orau yn ei ddydd am ei allu arbennig i gymodi.

Awdur

• Benjamin George Owens

Ffynonellau

• Llyfr eglwys Rhydwilym yn Ll.G.C.
• Joshua Thomas, Hanes y Bedyddwyr ymhlith y Cymry: o amser yr Apostolion, hyd y flwyddyn hon: yn ddwy ran (Caerfyrddin 1778), 327, 334, 426, a A History of the Baptist Association in Wales (1795), 42

Dolenni Ychwanegol

• Wikidata: Q20734307

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/