ROBERTS, WILLIAM (1809 - 1887), gweinidog gyda'r Methodistiaid Calfinaidd, golygydd, ac awdur

Ganwyd yn Llannerch-y-medd, 25 Medi 1809. Addysgwyd gan John Richards, offeiriad ei blwyf, a bu yn ysgol William Griffith, gweinidog gyda'r Annibynwyr, Caergybi. Dechreuodd bregethu yng nghapel Hyfrydle, Caergybi, yn 1829. Aeth i Ddulyn am ychwaneg o addysg, crynhodd rai o Gymry Dulyn at ei gilydd, a thrwy hynny cychwynnwyd eglwys Gymraeg yn y ddinas honno. Fe'i cyfrifid yn un o'r pregethwyr mwyaf poblogaidd a godwyd yn sir Fôn erioed. Ordeiniwyd ef yn 1848. Cafodd alwad, 1855, i fugeilio eglwys y Methodistiaid Calfinaidd yn Efrog Newydd, U.D.A., a thra bu yn y ddinas honno arolygodd argraffu'r Beibl Cymraeg cyntaf a gyhoeddwyd, 1858, gan Gymdeithas y Beiblau, U.D.A. Symudodd o Efrog Newydd yn 1877 i fugeilio eglwys Moriah (Methodistiaid Calfinaidd), Utica, talaith Efrog Newydd, a bu yno am 10 mlynedd, sef hyd ei farw. Bu'n olygydd Y Cyfaill (Utica); buasai eisoes yn golygu Y Traethodydd yn America o 1857 hyd 1860. Cyhoeddodd Darlith ar Elfennau Pabyddiaeth, 1855; Traethawd ar Etholedigaeth Gras, 1856; a Y Pechod o esgeuluso Moddion Gras, 1865. Bu farw 2 Hydref 1887.

Awdur

• Robert (Bob) Owen, (1885 - 1962)

Ffynonellau

• Moriah, Utica, N.Y., U.S.A., 1830-1930, 16-7
• T. S. Griffiths, Hanes y Methodistiaid Calfinaidd yn Utica, N.Y. (Utica 1896), 1936, 92-104

Gweithiau

• David Jones, Owen Thomas, John Parry, Cofiant y Parchedig John Jones, Talysarn (Efrog Newydd 1868)

Dolenni Ychwanegol

• Wikidata: Q20804833

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/