Llyfrgell Genedlaethol Cymru :: Y Bywgraffiadur Cymreig

A B C D E F G H I J K L M N O P Q R S T U V W X Y Z

RAVENSCROFT , teulu a gysylltir â phlwyf Penarlâg , ond a hanoedd o Ravenscroft , Middlewich , yn sir Gaerlleon ; cynrychiolid y brif gainc ohonynt yn y 17eg g. gan dylwyth o'r enw Croxton . Yn y 14eg g. yr ymddengys y gainc (iau) o'r Ravenscroftiaid yng Nghymru ; ond cychwynnwn yma gyda HUGH DE RAVENSCROFT , a oedd yn stiward yr Hôb a Phenarlâg a'r Wyddgrug , ganol y 15fed g. , ac a briododd ag Isabella Holland o Bretton ym Mhenarlâg . Heb ymboeni â'i fab Henry (a fu f. 1486 ) nac â'i ŵyr Ralph Ravenscroft , nodwn ddau o feibion Ralph , sef (1) George a (2) John .

(I) GEORGE RAVENSCROFT ‘o Bretton ,’ mab hynaf y Ralph uchod; ohono ef y tardd rhes o uchelwyr blaenllaw yn eu sir; yr oedd ef yn fyw yn 1517 , a'i fab THOMAS RAVENSCROFT yn fyw yn 1547 . Mab hynaf Thomas Ravenscroft oedd GEORGE RAVENSCROFT , siryf 1578-9 , a fu f. yn 1592 ac a goffeir (fel eraill o'r tylwyth) yn eglwys Penarlâg ; bu'n aelod seneddol dros ei sir yn 1563-7 ; yr oedd ei briod, Dorothy , yn ferch ac aeres John Davies , cwnstabl castell Penarlâg a pherchen tŷ Broadlane gerllaw iddo. (Chwaer i'r George Ravenscroft hwn oedd Elizabeth , priod yr arglwydd-ganghellor Thomas Egerton y gwelir ei hanes rhamantus yn y D.N.B. ). O blant George , dylid enwi ei ferch Katherine , a briododd â Robert Davies o'r Gwysaneu [q.v.] , a thri o'i feibion:

(1) THOMAS RAVENSCROFT , y mab hynaf, siryf 1606-7 , a fu f. 1630 . Meibion iddo ef oedd ROBERT RAVENSCROFT ( 1589 - 1640 , aelod seneddol yn 1614 ), a THOMAS RAVENSCROFT , cychwynnydd cainc annibynnol ‘ Ravenscroft o Pickhill ’ yn sir Ddinbych (ond nepell o Fangor Iscoed , gw. P. Fadog , iii, 181). Mab Robert Ravenscroft oedd y cyrnol THOMAS RAVENSCROFT a ddaeth i beth sylw yn y Rhyfel Cartrefol . Serch bod ei briod yn ferch i'r Brenhinwr pybyr William Salusbury [q.v.] o Rug , ochrai ef gyda'r Senedd , ac ym mis Tachwedd 1643 traddododd gastell Penarlâg i fyddin y Senedd — ‘ betrayed by one Ravenscroft ’ yw geiriau sgornllyd yr archesgob John Williams am y peth ( J. R. Phillips , Civil War in Wales , i, 180; ii, 99). Ym mis Mai 1648 (op. cit., ii, 371) penodwyd ef yn aelod o'r pwyllgor seneddol a arolygai sir y Fflint ; ond ar ôl 1660 maddeuwyd ei gamwedd iddo. Dilynwyd ef gan ei fab EDWARD RAVENSCROFT , a briododd ag Anne , ferch Syr Richard Lloyd o Esclus [q.v.] , ac a fu f. 1678 . Eu mab hwy — a'r gŵr olaf o'r tylwyth hwn — oedd THOMAS RAVENSCROFT (‘o Broadlane ’), 1670 - 1698 , siryf 1692 , aelod seneddol 1697-8 , a fu f. 3 Mai 1698 , gan adael dwy aeres, Honora a Catherine . Trwy briodas â merch i Honora y daeth teulu Glynne [q.v.] , a theulu Gladstone wedyn, i feddiant o Broadlane , a ailadeiladwyd yn 1752 ac a elwir heddiw'n ‘ Gastell Penarlâg .’ Ar y llaw arall, prynwyd cyfran Catherine o'r stad (yn 1756 ) gan deulu Grosvenor .

(2) WILLIAM RAVENSCROFT , ail fab George Ravenscroft , a aned yn Bretton ac a aeth i Goleg Brasenose yn Rhydychen ac i Lincoln's Inn (yr oedd yn ‘ Bencher ’ yno); cafodd y swydd o ‘ Clerk of the Petty Bag ’ yn y Siawnsri . Bu'n aelod seneddol dros sir y Fflint yn 1586-7 ac yn 1601 , dros Old Sarum yn 1604-11 , a thros fwrdeisdrefi'r Fflint yn 1620-2 , 1624 , 1625 , a 1628 . Bu farw'n ddi-briod yn 1628 , a chladdwyd ym Mhenarlâg .

(3) ROGER RAVENSCROFT (a fu f. 1634 ), rheithor Dodleston yn sir Gaerlleon . Ar ryw olwg, y mwyaf adnabyddus o'r holl deulu yw mab iddo ef, sef y cerddor THOMAS RAVENSCROFT ( 1592 - 1635? ), a aned ym Mhenarlâg ac a enillodd ei le yn y D.N.B. Cynefin ddigon, yn ein llyfrau tonau cynulleidfaol, yw'r geiriau ‘o Sallwyr Ravenscroft ,’ sef y llyfr The Whole Book of Psalms a olygodd ef yn 1621 ac y cyfrannodd iddo gynganeddion i 48 o donau. Ni sonnir dim am ei dras yn y D.N.B. , ond y mae ei Melismata , 1611 , yn cynnwys cyflwyniad i'w ddau ewythr Thomas a William a enwyd dan (1) a (2) uchod.

(II) JOHN RAVENSCROFT , ail fab Ralph Ravenscroft , a chychwynnydd cainc ‘ Ravenscroft o Benarlâg ,’ gw. yr ach yn P. Fadog , v, 271-2. Aeth ail ŵyr y John hwn, THOMAS RAVENSCROFT (g. ym Mhenarlâg yn 1563 ) i Middlesex ; claddwyd ef yn Barnet (Herts) yn 1630 . Yr oedd ei fab ef, JAMES RAVENSCROFT ( 1595 - 1679 ), bargyfreithiwr , yn enwog am ei elusengarwch. O blant niferus hwnnw, rhydd y D.N.B. gryn le i un, sef y dramodydd EDWARD RAVENSCROFT , eto heb fanylu ar ei dras. Cyflwynodd hwn un o'i ddramâu i'r Thomas Ravenscroft ( 1670 - 1698 ), a enwyd dan I (1) uchod, am ei fod yn gâr iddo. Yn 1643 y g. Edward Ravenscroft , yn Colston Bassett (Notts) , a chladdwyd ef yno 13 Chwefror 1703/4 .

Llyfryddiaeth:

A memoir of Hawarden parish, Flintshire, containing short introductory notices of the princes of North Wales so far as to connect, and elucidate, distant and obscure events , Caer, 1822 (gan Richard Willett , 1822 ), 32, 90;
History of the Princes, the Lords Marcher, and the Ancient Nobility of Powys Fadog , v, 264-72;
W. R. Williams , The History of the Parliamentary Representation of Wales , 1895 ;
cyfeiriadau eraill a roddwyd uchod.
Ond nid yw'r awdurdodau hyn yn fanwl nac yn gwbl gyson â'i gilydd, a phrif garn yr ysgrif uchod yw'r manylion helaeth a gafwyd drwy garedigrwydd y Parch. R. Bathurst Ravenscroft , rheithor Calverton (Bucks) ac awdur The History of the Ravenscroft Family , 1915 , 1915 .

Awdur:

Yr Athro Emeritus Robert Thomas Jenkins, C.B.E., D.Litt., Ll.D., F.S.A., (1881-1969), Bangor