Llyfrgell Genedlaethol Cymru :: Y Bywgraffiadur Cymreig

A B C D E F G H I J K L M N O P Q R S T U V W X Y Z

PRITCHARD , ROWLAND HUW ( 1811 - 1887 ), cerddor ; g. 14 Ionawr 1811 yn y Graienyn , ger y Bala . Hanoedd o deulu'r bardd Roland Huw [q.v.] . Dysgodd gerddoriaeth yn ieuanc, a llafuriodd drwy ei oes gyda chaniadaeth a cherddoriaeth. Yn 1844 dug allan Cyfaill y Cantorion yn cynnwys tua 40 o donau, y rhan fwyaf ohonynt o'i waith ef; ynddo ceir ei dôn ‘ Hyfrydol ,’ 8.7.D a gyfansoddodd yn 20 oed. Cyhoeddodd hefyd Y Fasged Gerddorol , sef crynodeb o egwyddorion cerddoriaeth. Cyfansoddodd a chynganeddodd lawer o donau a rhai anthemau, a cheir hwynt yn Haleliwia , 1849 , Haleliwia Drachefn , 1855 , Llyfr Emynau a Thonau ( Stephen a Jones ), a chasgliadau eraill. Symudodd i Dreffynnon yn swyddog dan y ‘ Welsh Flannel Manufacturing Co. ’ Bu f. 25 Ionawr 1887 . [Gw. Adgofion Andronicus , 49.]

Llyfryddiaeth:

M. O. Jones , Bywgraffiaeth Cerddorion Cymreig , Cymdeithas yr Eisteddfod Genedlaethol, 1890 ;
Y Cerddor , Mehefin 1893 ;
R. D. Griffith , Hanes canu cynulleidfaol Cymru , Caerdydd, 1948 .

Awdur:

Robert David Griffith, M.A., (1877-1958), Hen Golwyn

Atodiadau a chywiriadau:

PRICHARD , ROWLAND HUW ( Bywg. ,752 o dan PRITCHARD ) Y mae mwy o warant dros y ffurf heb y ‘t’. Yn 1880 yr aeth i Dreffynnon , ac yn eglwys S. Pedr yno y cl. ef.