PARRY, WILLIAM (1743 - 1791), peintiwr portreadau

mab John Parry, ' y telynor dall '. Ganwyd ef yn Llundain ar yr 2il o Fai 1743 wedi i'w dad symud yno o Riwabon, ac astudiodd yn ysgol arlunio Shipley, yn oriel dug Richmond, a'r academi yn St. Martin's Lane, cyn dyfod yn ddisgybl i Syr Joshua Reynolds. Enillodd amryw o wobrwyon Cymdeithas y Celfyddydau, ac etholwyd ef yn aelod o Gymdeithas Unedig yr Artistiaid. Wedi treulio peth amser yn peintio ger Rhiwabon, galluogwyd ef trwy haelioni ei noddwr, Syr Watkin Williams-Wynn, i fyned i'r Eidal yn 1770. Dychwelodd i Brydain yn 1775, ac yn 1776 etholwyd ef yn A.R.A.

Portreadau lled fychan eu maint oedd mwyafrif ei ddarluniau, ac yn ystod y blynyddoedd o 1776 i 1788 derbyniwyd 22 ohonynt ar gyfer arddangosfeydd yr Academi Frenhinol. Bu farw gwraig Parry, merch y pensaer Henry Keene, yn 1779, a threuliodd ef lawer o'i amser ar ôl hynny yn Rhufain. Dychwelodd i Gymru yn gynnar yn 1791, a bu farw 13 Chwefror yr un flwyddyn.

Awdur

• Megan Ellis, (1906 - 2001)

Ffynonellau

• Oxford Dictionary of National Biography
• Graves, The Royal Academy of Arts (1905–6), vi, 63

Dolenni Ychwanegol

• VIAF: 95807723
• Wikidata: Q8016605

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/