PARRY, JOHN (1770 - 1820), bardd

Ganwyd 29 Mehefin 1770 mewn fferm o'r enw Y Wern, ger Llanelian, sir Ddinbych. Ef efallai yw'r John Parry, mab Edward a Catherine Parry, y nodir ei fedyddio ar 31 Awst 1770 yng nghopïau cofrestri plwyf Llanelian. Derbyniodd addysg dda, fel y mae'n amlwg oddi wrth ansawdd ei farddoniaeth. Pan oedd yn 28 oed, priododd ag Elsbeth Huws, Ffermnant, Llanelian, ac ar un adeg cadwai ef a'i wraig westy yn y pentref. Bu farw 25 Mehefin 1820, a chladdwyd ef ar y 28 o'r un mis ym mynwent y plwyf. Cyfansoddodd gryn dipyn o farddoniaeth, o natur grefyddol gan mwyaf, ac yr oedd yn enwog am ei atebion ffraeth. Ceir detholiad o'i weithiau yn Y Wenynen Bach a olygwyd gan Robert Humphreys (ail arg., Llanrwst, 1840). Ei gân fwyaf adnabyddus yw ' Myfyrdod Mewn Mynwent,' cerdd nid annhebyg mewn mannau i ' Elegy written in a Country Church-yard ' Thomas Gray.

Awdur

• Hywel David Emanuel, (1921 - 1970)

Ffynonellau

• Y Geninen, Ionawr 1893, 56-8; 1904, 72
• Geirlyfr Bywgraffiadol o Enwogion Cymru (1870), 809
• Owen Williams, Awduron Sir Ddinbych a'u gweithiau (1937), Rhan 3, 136
• Catalogue of Printed Literature in the Welsh Department, Cardiff Free Libraries (1898), 366
• cofrestri'r Eglwys yng Nghymru (yn Ll.G.C.)

Dolenni Ychwanegol

• Wikidata: Q20738110

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/