Llyfrgell Genedlaethol Cymru :: Y Bywgraffiadur Cymreig

A B C D E F G H I J K L M N O P Q R S T U V W X Y Z

OWEN , JOHN ( 1757 - 1829 ), ysgrifennwr ar bynciau crefyddol ; g. yn 1757 ym Machynlleth , lle y bu am lawer blwyddyn yn cadw busnes groser a hefyd yn bartner gyda Hugh Williams ‘y Chartist’ [q.v.] yng ngwaith plwm Dylife . Ymunodd yn fore â'r Methodistiaid Calfinaidd , ond er ei fod yn Fethodist ymroddgar, ni ddygymyddai ag ordeiniad 1811 . Wedi marw ei wraig, symudodd i Langyndeyrn yn sir Gaerfyrddin , ac yno y bu f., yn 1829 , yn 72 oed. Ymddiddorai mewn diwinyddiaeth a seryddiaeth ; ac y mae rhywbeth anarferol yn ei gynhyrchion, pan gofiwn ei yrfa. Cyhoeddodd yn 1788 Troedigaeth Atheos , math o epig, efelychiad o ‘ Bantycelyn ,’ gyda nodiadau a fenthyciwyd gan mwyaf o Golwg ar y Byd David Lewis [q.v.] o Langatwg Nedd ; aeth hwn i ail argraffiad yn 1818 (a thrydydd yn 1871 ); gw. y disgrifiad ohono yn Llyfryddiaeth y Cymry , 633. Yn 1797 cyhoeddodd Golygiadau ar Achosion ag Effeithiau'r Cyfnewidiad yn Ffrainc , dogfen bur nodedig o agwedd y Methodistiaid Cymreig at broblemau gwleidyddol — amlinelliad ohono gan J. J. Evans , Dylanwad y Chwyldro Ffrengig , 169-70. I 1818 y perthyn Golygiad ar Adfywiad Crefydd yn yr Eglwys Sefydledig yng Nghymru o ddeutu y flwyddyn 1737 , gwaith a achlysurwyd gan farwolaeth John Evans [q.v.] o'r Bala , ac sy'n cynnwys nodiadau ar bregethwyr y Methodistiaid Calfinaidd . Heblaw'r uchod, cyhoeddodd John Owen Difrifol Ystyriaeth , 1789 ; Tair Cerdd Newydd , 1795 ; a Golygiad ar Athrawiaeth y Drindod ac ar Berson Crist , 1820 . Ŵ yr iddo oedd D. C. Lloyd-Owen [q.v.] .

Llyfryddiaeth:

R. Williams , Montgomeryshire Worthies , ail arg., 1894 ;
Cardiff Free Libraries, Catalogue of Printed Literature in the Welsh Department , 1898 ;
a'r cyfeiriadau uchod.

Awdur:

Yr Athro Emeritus Robert Thomas Jenkins, C.B.E., D.Litt., Ll.D., F.S.A., (1881-1969), Bangor