OWEN, THOMAS ELLIS (1764 - 1814), clerigwr

Ganwyd yng Nghonwy 5 Rhagfyr 1764, ond nis bedyddiwyd cyn 25 Mawrth 1765; mab i William Owen, dilledydd a threthgasglydd, a'i wraig Elizabeth Ellis, Glan-y-wern, Mochdre, ferch John Ellis, atwrnai. O ysgol Westminster aeth yn 1785 i Goleg Eglwys Crist, Rhydychen; graddiodd yn 1789. Penododd ei goleg ef yn 1790 yn ficer South Stoke (swydd Rhydychen), ond ar 10 Rhagfyr 1794 cafodd reithoraeth Llandyfrydog gyda Llanfihangel-tre'r-beirdd; yr oedd hefyd o ddiwedd 1812 yn gurad parhaol Penmynydd - i gyd ym Môn, ym Miwmares y cartrefai. Bu farw 1 Rhagfyr 1814, a chladdwyd yn Llanfair-is-gaer (Y Felinheli), lle y mae tabled goffa iddo. Y mae'n hysbys fel awdur dau bamffled gwrth-Fethodistaidd, Hints to Heads of Families, 1801 (dau arg., 3ydd yn 1802), a Methodism Unmasked, 1802; atebwyd y blaenaf gan Thomas Charles (a Thomas Jones) yn The Welsh Methodists Vindicated, 1802, a chan Twm o'r Nant mewn cerdd ffyrnig, 'Cân ar Berson Paris ,' 1802 - nid yw Llandyfrydog ymhell o Fynydd Parys.

Awdur

• Yr Athro Emeritus Robert Thomas Jenkins, (1881 - 1969)

Ffynonellau

• D. E. Jenkins, Life of Thomas Charles (Dinbych 1908), ii, 391, gyda Llawysgrif Bangor yng Ngholeg y Gogledd, Bangor 6455 yn llyfrgell Coleg y Gogledd
• adarg. o'r Hints to Heads of Families (1801, 1905), gyda rhagymadrodd gan D. E. Jenkins, 1905, gweler hefyd y bennod 38 o'i lyfr ar Charles

Dolenni Ychwanegol

• VIAF: 66023189
• Wikidata: Q18757146

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/