Y Bywgraffiadur Cymreig


A  B  C  D  E  F  G  H  I  J  K  L  M  N  O  P  Q  R  S  T  U  V  W  X  Y  Z



KINSEY , WILLIAM MORGAN ( 1788 - 1851 ), clerigwr, teithiwr, ac awdur ;

g. yn y Fenni , mab Robert Morgan Kinsey , cyfreithiwr a bancer yn y dref honno, a'i wraig Caroline Hannah , merch Syr James Harington , barwnig . Cafodd ei addysg yn Rhydychen (ymaelodi 28 Tachwedd 1805 , ysgolor yn Trinity College , B.A. 1809 , M.A. 1813 , B.D. 1822 , cymrawd ei goleg 1815 , deon 1822 , is-lywydd 1823 , ‘ bursar ’, 1824 ). Yn 1827 bu'n teithio yn Portiwgal , a'r flwyddyn ddilynol cyhoeddodd lyfr a gyfrifid yn werthfawr am gyfnod, sef Portugal Illustrated: in a series of letters, embellished with a map, plates of coins, etc. ( London , 1828 ; 2il arg. yn 1829 ). Bu wedyn yn teithio yn Belgium (gyda'r viscount Alford ), a digwyddodd fod yn llygad-dyst o'r cythrwfl yn Brussels yn Awst 1830 ar adeg gwrthryfel. Tua'r flwyddyn 1832 ( 1831? ) dewiswyd ef yn weinidog S. John's , Cheltenham , lle yr enillodd enw iddo'i hun fel pregethwr . Cyhoeddodd rai o'i bregethau, e.e. A sermon on the public advantages of social combinations founded on Christian principles ( Cheltenham , 1831 ) a The Jubilee of the Bible; or, three hundredth anniversary of Coverdale's translation of the whole Bible … a sermon preached at … Cheltenham ( London , 1835 ). Ceir erthygl ganddo yn y Gentleman's Magazine , Ionawr 1848 . Yn 1843 cafodd ei ddewis yn rheithor Rotherfield Greys , sir Oxford , lle y bu f. 6 Ebrill 1851 .

Ffynonellau:

  • Oxford Dictionary of National Biography

Awdur:

Syr William Llewelyn Davies, M.A., LL.D., F.S.A. (1887-1952), Aberystwyth

Blwyddyn Cyhoeddi: 1953-54