JONES, CAIN (fl.1775-95), almanaciwr

Mab John Edwards ('Sion y Potiau'). Ni wyddys ddyddiad ei eni, ond bedyddiwyd ei frawd Abel, a fu'n weinidog gyda'r Bedyddwyr ym Merthyr Tydfil, yn Llansantffraid Glyn Ceiriog, 21 Rhagfyr 1740, a theg yw casglu fod Cain yn hŷn nag Abel. Ar farwolaeth Gwilym Howel, yn 1775, ymgymerodd â golygu'r almanac Tymmhorol, ac wybrennol Newyddion. Bu'n gyfrifol am 20 rhifyn a gyhoeddwyd gan Eddowes yn Amwythig, ac eithrio'r olaf yn unig, sef rhifyn 1795, a gyhoeddwyd gan J. Marsh yng Ngwrecsam. Nid oes gofnod am almanac diweddarach ganddo. Yr oedd yn ymhel rhyw gymaint â barddoniaeth, a cheir marwnad o'i waith yn almanac 1783.

Mab iddo oedd

JOHN CAIN JONES (bu farw 1826?)

Ysgrifennai dan yr enw 'Siôn Ceiriog.' Ceir llythyrau gan John Cain Jones yn NLW MS 1891E , penillion ar donau 'Y Mynach Du' a 'Gwel yr Adeilad' yn NLW MS 1817E , salmdonau yn NLW MS 1932E , 'Cerdd hanes rhyw gidwm gwaedlyd o'r Cymdu' yn NLW MS 6729B , a 'Cerdd annerch Mr. Edward Bennion, physygwr,' yn NLW MS 12868B . Dywedir iddo farw yn 1826, a bod ganddo ferch, Leah Evans, yn brydyddes awenyddol yng Nglyn Ceiriog.

Awdur

• Evan David Jones, (1903 - 1987)

Ffynonellau

• W. Rowlands, Llyfryddiaeth y Cymry (Llanidloes 1869), 503
• Y Tyst Apostolaidd, 1850, 136-7
• almanaciau Cain Jones

Darllen Pellach

• Archifau LlGC: Almanaciau Cymraeg

Dolenni Ychwanegol

• Wikidata: Q18526697

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/