HUGHES, HUGH MICHAEL (1858 - 1933), gweinidog gyda'r Annibynwyr

Ganwyd 13 Awst 1858 yn Llanllechid, Sir Gaernarfon, mab Michael ac Elisabeth Hughes. Cafodd ei addysg yn y Coleg Coffa, Aberhonddu, ac yng ngholegau'r brifysgol yn Aberystwyth a Chaerdydd. Fe'i hordeiniwyd yn 1886 a bu'n bugeilio eglwysi'r Hen Dabernacl, Caergybi; Grove Street, Lerpwl; ac Ebenezer, Caerdydd - yr olaf o'r rhain am yn agos i 40 mlynedd. Yr oedd yn bregethwr nodedig, yn amlwg iawn yng nghylchoedd addysg Cymru, ac yn ysgrifennu ar bynciau diwinyddol, gwleidyddol, a chymdeithasol.

Bu'n golygu Y Tyst, papur wythnosol yr Annibynwyr Cymraeg, am rai blynyddoedd, ac am 20 mlynedd yn ysgrifennydd cronfa ariannol capeli ei enwad. Bu'n llywydd Undeb yr Annibynwyr Cymraeg, yn is-lywydd Coleg Prifathrofaol Caerdydd, ac yn aelod o Lysoedd Prifysgol a Llyfrgell Genedlaethol Cymru; yr oedd hefyd yn aelod o fwrdd diwinyddol Prifysgol Cymru ac yn gadeirydd pwyllgor y Coleg Coffa, Aberhonddu. Cyhoeddodd John Penry, Yr Iesu Sicr, Griffith John, arwr China, ac Esboniad ac yr Ephesiaid. Yr oedd yn B.A. (Cymru), 1898, gydag anrhydedd yn y dosbarth blaenaf mewn athroniaeth, a chafodd radd LL.D. ('honoris causa'), 1930, gan ei brifysgol. Yr oedd hefyd yn O.B.E.

Priododd Mary Ann Howell, Aberystwyth, a bu iddynt fab a merch. Bu farw 15 Ionawr 1933 yng Nghaerdydd, a'i gladdu ym mynwent Cathays.

Awdur

• Thomas Michael Hughes, (1888 - 1957)

Ffynonellau

• Who's who?
• adnabyddiaeth bersonol

Dolenni Ychwanegol

• VIAF: 220453944
• Wikidata: Q20733199

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/