HUGHES, DAVID (1800 - 1849), gweinidog gyda'r Annibynwyr

Ganwyd yn Amlwch, sir Fôn, mab amaethwr cefnog. Cafodd addysg dda yng nghylch ei gartref; bu hefyd mewn ysgol yn Lerpwl. Ymaelododd yng nghapel y Tabernacl, Lerpwl, o dan weinidogaeth John Breese, a dechreuodd bregethu yno. Wedi iddo fod yng Ngholeg Caerfyrddin, 1824-28, urddwyd ef yn weinidog eglwys Heol y Felin, Casnewydd-ar-Wysg, 1 Ionawr 1829. Ddeng mlynedd yn ddiweddarach urddwyd ef (11-13 Mehefin 1839) yn weinidog Trelech, Sir Gaerfyrddin. Cyhoeddodd Holwyddoreg gwerthfawr at wasanaeth ysgolion Sul, a bu'n gweithio'n ddyfal am flynyddoedd ar eiriadur cyffredinol ond ni orffennwyd mohono. Bu farw 20 Chwefror 1849.

Awdur

• Y Parchedig John Dyfnallt Owen, (1873 - 1956)

Ffynonellau

• E. Pan Jones, Oriel Coleg Presbyteraidd, Caerfyrddin: yn cynwys hanes yr holl fyfyrwyr fu yn y coleg o 1796 hyd 1899 (Merthyr Tydfil 1909), 45
• Hanes Eglwysi Annibynnol Cymru, iii, 397, 403-6
• Josiah Thomas Jones, Geiriadur Bywgraffyddol o Enwogion Cymru (Aberdâr 1867-70), i, 544-7
• Walter J. Evans, NLW MS 10327B: Carmarthen Presbyterian College roll of students

Dolenni Ychwanegol

• Wikidata: Q20821104

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/