HUGHES, DAVID (1785 - 1850), clerigwr ac awdur

Mab Daniel Hughes, Trefilan, Sir Aberteifi. Addysgwyd yn ysgol Ystrad Meurig a Choleg Iesu, Rhydychen, a graddio yn B.A. yn 1806 ac yn M.A. yn 1809. Yn 1805 dechreuodd weithio i Wasg Prifysgol Rhydychen fel un o'r rhai a oedd yn cywiro argraffiad diwygiedig y Beibl Cymraeg, a gyhoeddwyd yn 1809; yn 1806 etholwyd ef yn ysgolor o Goleg Iesu. Urddwyd ef yn esgobaeth Rhydychen (?) ac yn Rhagfyr, 1808, cafodd ei sefydlu'n rheithor Hirnant, ger Llangynog, ond nid ymddengys iddo drigiannu yno. Yn Nhachwedd 1813 sefydlwyd ef yn rheithor Llanfyllin, a bu yno hyd ei farw, 11 Ebrill 1850. Yn Llanfyllin y claddwyd ef. Sonnir amdano fel cymeriad disglair mewn mathemateg, ac ysgolhaig gwych mewn Hebraeg ac yn y clasuron, a hefyd fel gŵr tra defosiynol. Bu'n un o arholwyr cyhoeddus Prifysgol Rhydychen, 1810-1.

Awdur

• Thomas Iorwerth Ellis, (1899 - 1970)

Ffynonellau

• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• Foster, Alumni Oxonienses: the members of the University of Oxford
• D. E. Jenkins, Life of Thomas Charles (Dinbych 1908), ii, 597; iii, 99
• H. B. Thomas, A History of the Diocese of St. Asaph (1874)
• gweithrediadau esgobol Llanelwy yn Ll.G.C.

Dolenni Ychwanegol

• Wikidata: Q5235221

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/