EVANS, JOHN (1768 - c. 1812), awdur llyfrau ar deithiau yng Nghymru

Efallai ei fod yn fab Benjamin Evans, offeiriad yn Lydney, swydd Gloster. (Fe'i cymysgir weithiau â John Evans, ysgolfeistr ym Mryste, awdur llyfrau ynglyn a Bryste, a thraethodau athronyddol.) Cafodd ei addysg yng Ngholeg Iesu, Rhydychen (ymaelodi 1789, B.A., 1792).

Ychydig a wyddys am John Evans ar wahân i'w weithiau - pedwar llyfr yn disgrifio Cymru : (a) A Tour through part of North Wales in … 1798 and at other times: principally undertaken with a view to Botanical researches … (London, 1800; arg. eraill yn 1802 a 1804); (b) Letters written during a Tour through South Wales in … 1803 and at other times, … 1804; (c) ' Monmouthshire ' yng nghyfrol xi y gwaith a enwir The Beauties of England and Wales; a (ch) ' North Wales ' yng nghyfrol xvii yr un gwaith, 1812; yr oedd i ysgrifennu ar Dde Cymru i'r cyhoeddiad hwn, eithr bu farw ar ôl ysgrifennu cyfran fechan ohono. Er bod ei lyfrau yn llawn o fanylion diddorol, y mae'n amlwg fod mwy o ôl darllen ynddynt nag o ôl sylwadaeth wrth drafaelio. Er enghraifft y mae'r hyn a ddywed am weithiau glo yn Sir Benfro (yn y Tour through South Wales … 1804) yn aralleiriad o'r hyn a ysgrifenasid gan George Owen, Henllys, ddwy ganrif yn gynt. Bu farw c. 1812, h.y. cyn cyhoeddi cyfrol xvii y Beauties of England and Wales.

Awdur

• Frederick John North, (1889 - 1968)

Ffynonellau

• Oxford Dictionary of National Biography, vi, 932
• T. R. Roberts, Eminent Welshmen: a short biographical dictionary of Welshmen... from the earliest times to the present (1908)
• T. Rees, The beauties of England and Wales (1815), xvii
• T. Rees, A topographical and historical description of South Wales (1815), v-vi

Dolenni Ychwanegol

• VIAF: 67956405
• Wikidata: Q6232019

Dyddiad cyhoeddi: 1953

Hawlfraint Erthygl: http://rightsstatements.org/page/InC/1.0/