EVANS, DAVID (1705 - 1788), offeiriad, llenor, a cherddor

Ganwyd yn Llangynyw, Sir Drefaldwyn, mab i'r Parch. D. Evans, Llangynyw. Addysgwyd ef yn Rhydychen; graddiodd yn B.A. yn 1728, ac yn M.A. yn 1731, ac yn ddiweddarach yn D.D. Cafodd ficeriaeth gorawl Llanddwyn yn 1734 a rheithoriaeth Llanerfyl yn 1737. Yn 1737 newidiodd Lanerfyl am Lanymynech, lle y bu yn ficer am y gweddill o'i oes. Yn 1772 cafodd ganoniaeth Llanelwy. Yr oedd yn ysgolhaig gwych. Cynorthwyodd Dr. Charles Burney i ysgrifennu ei History of Music, ac Edward Jones ('Bardd y Brenin') ynglŷn ag alawon Cymreig y Musical … Relicks of the Welsh Bards. Ymysg ei bapurau, cafwyd llythyr oddi wrth un o'i gyfeillion yn gofyn am gynhorthwy yn y geiriau hyn: 'Y mae cyfaill imi o'r enw Samuel Johnson, yn son am gyhoeddi Dictionary o'r iaith Saesneg, a byddai yn rhwymedig iawn i chwi am anfon rhestr o'r geiriau Saesneg hynny sydd a'u tarddiad oddiwrth y Gymraeg.' Bu farw 1788, a chladdwyd ef yn eglwys Llanymynech, lle y mae cofgolofn farmor iddo.

Awdur

• Robert David Griffith, (1877 - 1958)

Ffynonellau

• Geirlyfr Bywgraffiadol o Enwogion Cymru (1870)
• M. O. Jones, Bywgraffiaeth Cerddorion Cymreig (1890)
• Edward Jones, Rhestr gyda nodiadau byrion, o Enwogion Cymreig o 1700 i 1900 (1908)
• R. Williams, Montgomeryshire Worthies (1894)

Dolenni Ychwanegol

• Wikidata: Q5233450

Dyddiad cyhoeddi: 1953

Hawlfraint Erthygl: http://rightsstatements.org/page/InC-RUU/1.0/